.....beeti raat SHIMLE mein barf padi thi

anurag kashyap aur 2b ke liye--

main aksar is sadak pe aake
khada hota hoon
phir palat ke dekhta hun
us sadak ki taraf
jispe tangi takhti pe likha hai
ye sadak aage nahi jaati.


sadak wahi hai
jispe main khada hun
sirf muh modne bhar se
likha padhne mein aata hai
ki sadak aage nahi jaati.

fir saamne dekhta hun
usi sadak ki taraf
jispe bina likhe
padhne mein aata hai
ye sadak zindgi ki taraf jaati hai.

cigarette jalata hun
kahin koi galti hui
ya galat raashte pe aake khada ho gaya.

seene mein dard uthta hai
khaansi aati hai
jaise tumne jore ki thaap seene pe maari ho
aur main bolta hun
aise nahi maarte
mera dil kamzor hai
aur tum hansti ho
dil kamzor hai?
aur mujhse ISHQ karte ho?

maine kaha
dil ka kamzor hona ishq ki pahli shart hai?
cigarette bujh gayi kya?
ya muh mein ab tak nahi lagayi
jalayee bhi?
dibbi mein thee bhi
jeb mein haath bhi daala kya?
nikali wahan se?

khair jeb mein
us dibbi mein
aakhri cigarette thi
wo bhi tooti thi
maachis ki teeli ka masala toota tha
shaayad jalata to bhi na jalti

over-coat ko tatola
poori tarah se bheeg gaya hun
thandi hawa bhi hai
aur toofan bhi
shaayad shimle mein barf padi hogi ?
shaayad!
tum apne hotel ke kamre se nikal ke
reception pe aayee hogi
shikayat karne
ki A.C kamra garm kyon nahi kar raha.?

over-coat phir tatoli
kaafi barf jama thi..
poori coat Shimle se jyada barfeeli thi.
par badan bheeg raha tha
pasheene se lathpath

tumne dawayein lee
neeli waali goli?
hari to subah khaani thi....
safed wali tab..
aur Laal wali?
tum khud se kha lena
tab main shimle mein hoongi

phone kar dena?
nahi kar paungi..
kyon?
ab tum kamati ho?
shimle mein phone nahi hai kya?
ya tumhe fikr nahi ?
ki mujhe dawa khaani hai?

koi jawab nahi
san-nataaaa
thode aansooo
subkiyan
bus.

bheed jama thi
subah ki talkhi thi
raat ko giri barf pighal rahi thi
log over-coat mein haath daale
ikat-tha the.

ek ne doosre ko aawaj di
kya hua?
dosra door se chillaya
koi mar gaya hai?
kahan?
SADAK AAGE NAHI JAATI WAALE LAMP POST KE NEECHE.

pahla bola...
THANDH SE MARA HOGA.
doosra bola..
beeti raat SHIMLE mein barf padi thi.